أنتي أيوا أنتي لازم تسمعيني

أنت اه أيوا أنت مالك مضايقة ليه

إيه بتقولي إيه زوجك؟

ماله زوجك

بصي بقى من قبل ما اسمع أي حاجة وأي شكوى عليه

زي كل الستات وتوجعي راسي بقصص وروايات

بصي طلعتي نزلتي ده جوزك

ده هو الأمير بتاعك

ده هو اللي اختارك

ده هو اللي اتحمل الصعاب واتحدى الماديات والظروف عشانك

ده اللي جري ودخل بيت أهلك وطلبك من بابه

مممم لسه مش مقتنعة

أختي في الله

الزوج له مكانه كبيرة وكرمه الله وفضله الله في كتابه الكريم بالقوامة

والرجل مسؤول في كل شيء في الصغيرة قبل الكبيرة

والزوج له احترامه وتقديره

متبصليش بأرف كده لا

لازم تعرفي كده

كفاية أنه عملك سكن تعيشي معاه فيه

فابحثي عن كل حاجة تكون فيها راحته

وكوني سلسة ومرحة في الحوار والنقاش معاه

مش كل ما يكلمك تزعقي وتصوتي

ايه قاعدة فين أنتي براحة على الراجل

شجعيه يقوم معاك في الصلاة

ويكون إمامك

وشجعيه تقوموا قيام الليل سوياً

فهي نور وتقرب قلوبكم في ذكر الله وحبه

اهتمي بيه زي ما بتهتمي بأولادك

أه اهتمي بلبسه ومظهره وشياكته فهذا دليل على أناقتك وذوقك أنت

- عارفة حتقولي ايه أوضبه عشان واحدة تاخده مني

أيه الرد الغبي ده مين اللي ياخده منك

يعني بالعقل انت اللي مختارة ليه اللبس والألوان ومنسقاها

ويروح لواحدة تانية يا شيخة اتقي الله

ده حتى يا شيخة لو بالفرض حصل كده

كفاية انها حتطلع منه مراتي اللي موضبالي الطقم ده

شفتي بقى أنك غلط إزاي

وصدقيني لو علمتي كده مش حيهون عليه خالص

بالعكس ده حيكون سعيد اوي بذوقك واختيارك للألوان مناسبة ليه

وبعدين

تعالي هنا ايه اللي عملاه في نفسك ده

وايه الجلابية دي

وايه المنديل يا خرابي الراجل ليه حق يطفش منك

مش ممكن ده أن تسدي النفس المفتوحة

قومي اتوضبي والبسي وخليكي دايما عروسة ليه

كل ليلة مش أيام الخطوبة والحب وشهر العسل

يا سلام مافيش حد زيك وبعد كده

أعوذ بالله من غضب الله

لا تقوليلي العيال وشغل البيت والتنظيف

وأصل ملقتش وقت لا بصي كلامك

ده كلام فارغ

الراجل ملهوش ذنب يجي من بره يلاقيكي بالمنظر ده

حرام عليك يا شيخة ده مش بس يطفش منك

ده كمان يكرهك

هو أنت متعرفيش ان الراجل المشكلة في عينيه

لما بيشوف حاجة حلوة خليكي حلوة على طول

متعرفيش هي دي كمان صعبة

وايه يعني ماتصلش بيكي ولا كلمك انهاردة

ولا جه من الشغل ودخل نام فيها ايه يعني

ما الراجل شقيان طول اليوم وطالع عينه عشان مين

مش عشانك وعشان عيالك ده انت لما تشوفيه تعبان

المفروض توفري ليه الهدوء في البيت وتوصي ولادك مافيش صوت

عشان والدكم تعبان مش عاملة مهرجان

ودخول وخروج وجارة داخلة وانت خارجة

كأن بيتك سوبرماركت في الشارع

ولازم تكوني قنوعة ومتطلبيش طلبات زيادة عن اللزوم

مش طالعة بتنشري ونازلة بتنشري

ولما يرفض مره يجيب ليكي حاجة

تقوم الدنيا وتقعد

وانت بخيل وانت وانت

ليه حصل ايه الله يمكن الراجل معهوش فلوس

وتذكري كلمة دي مني الراجل ممكن يقول أي حاجة

إلا كلمة انا ممعيش فلوس بتكون صعبة عليه أوي

يقولها لأي حد وخصوصا مراته

وبعدين مش أول ما يدخل البيت عريضة شكاوي من أبنك وابنتك والجيران ووالدتك

ايه في ايه هو حيطير ما هو قاعد اصبري ما يهدي وياكل ويرتاح

وبعدين قولي اللي عيازة تقوليه بس برضه بأسلوب كويس وبراحة مش بطريقة بتاعتك دي

كده انت حتعملي مشكلة تانية بدل ما تحلي المشكلة اللي كنت بتواجهيها

واهتمي بأهله وخصوصا والده ووالدته واعزميهم في بيتك وقومي بالواجب عليهم

وكوني لهم زي ابنتهم تماما وبطلي كلمة حماتي عشان كلمة دي بتعقدني قوليلها ياماما

ايه مالك بتبصي كده ليه ايوا قولي لوالدة زوجك يا ماما

هي مش أم وجابت أجمل راجل أنت ارتبطتي بيه

وبقى زوجك واكسبيها دايما في صفك وخليها دايما راضيه عنك

واكسبي دعائها لانها حتدعي لابنها اللي هو جوزك وشوفي دعاء الام بقى بيعمل ايه

وبعدين ايه يعني اتأخر فيها

أيه يعني ايه اللي حصل بتحاسبيه كده ليه

يا ستي اتأخر في الشغل كانت في ظروف في الطريق

ومش يعني هو مش مجوز وكيل نيابة يفتح معاه تحقيق

وفي مليون أسلوب وطريقة تسألي بيها اتأخر ليه

زي أحنا قلقنا عليك أوي طيب طمنا عليك من الموبايل

مش أول ما يدخل البيت أنت كنت فين وأتأخرت ليه

كل ده في الطريق ده انت نازل من الشغل بدري ،

حيلك حيلك براحة يا ماما ده مش أخوكي اللي بتكلميه

ده زوجك عارفة يعني ايه زوجك يعني ليه احترامه وتقديره

خلي بالك من عيالك واهتمي ببيتك وقومي بواجباتك كاملة

على أكمل وجه واتكلمي معاه بهدوء

وأدي فروض ربك صدقيني عمرك ما حتكون في اي مشكلة في بيتك

لأن في هدوء وإيمان وتفاهم ده حتى أنت كده حافظتي على أطفالك

أنهم يكونوا أسوياء في حياتهم النفسية ومش متوترين من المشاكل

اللي انت فيها أنت وزوجك

وبصي في الأخر لو عملتي الكلام ده

انت اللي كسبانة حتحافظي على بيتك وعلى أولادك وبرضه

كمان على زوجك وتأكدي كل راجل في عيب بس بيختلفوا

من راجل لراجل وكل واحدة عندها زوج تقول الحمدلله

ان زوجي لا بيشرب الخمر ولا بتاع زنا

وأنه بيصلي بعدها كل حاجة تهون

صدقيني

أحمدي ربنا أنت في نعمة في غيرك ربنا وقعها في زوج صعب العشرة

شفتي أديكي قلتي الحمدلله

ربنا يهدي زوجات المسلمين جيمعاً ويهدي أزواجهم

منقوووووووول
.

» من أنتي يا سماء ..